Tamazɣa AT ḤEMMU

Tamazɣa AT HEMMU, tlul 6 deg yunyuy 2001 deg Micli. D yelli-s n taddart n at εerbi i d-yezgan deg tɣiwant n Yiferḥunen (Micli).

Kkrey-d deg twacult meqqren i yefkan azal ameqqran i tmedyazt, i uẓawan d tẓuri. Baba d setti s yemma, d imedyazen ula d nutni, d ayen i yi-yefkan tayri d tebɣest ad kemley deg ugaraw n tira. Nnerneɣ-d deg yiwet n twennaḍt d tanesbaɣurt s yidles d wansayen. Bdiɣ tira seg wasmi i lliɣ meẓẓiyeɣ, asefru-w amezwaru uriɣ-t mi sεiɣ 11 n yiseggasen deg tudert-iw, syin i tebda tudert-iw d tmedyezt i d-uwiɣ seg yidammen. Seg yimir, llint-iyi tewwura, ukiɣ s tnefka i sεiɣ deg tmedyezt taqbaylit, dɣa, serrḥeɣ-as i tedyant-iw d usefru ad tefferfer war akukru, d tadyant i yettsemmiḍ yimru deg wass ɣer wass, tezdeɣ-itt tarramt d teblilt akked unadi ɣyef tenfalit tanaṣlit.
Amudd-agi n yiṣefra, d asikel deg wul n tmetti-nney, d asnirem n wuḍmawen-is usgiten yellan ama d idisan-is i yelhan d wid ur nelhi, sarameɣ amahil-agi ad awen-d yezg yef wul, ad awen-yefk lebɣi ad tbeddlem s kra i icemten deg tmurt-nney, ad t-terrem yecbeḥ, deg-s taydemt d tegmat ad d-ifrirent.
Lwaḥid, afus deg ufus ad neẓẓiu zerriεa n tegmat, syin, ad d-nemger tayri, tilelli d talwit.