Nèg Mawon

"Nèg Mawon", sé on krèy poèm anlè fòs a Nèg-la pou ba Nèg-la fòs-la. Pou fè nou vwayajé an tèt a Nèg Mawon, adan lidé a gawoulé a moun démouné ki vlé woupwan doubout a-yo, pou ba lavi ondòt kanman, pi jis, pi bèl, pi dous é pi plézab osi.
Sé poézi pou fè lang-la swingé. Anlè soufwans a Nèg, dèpi yo yè jous nou jòdla, anba chenn lajan a Léta ka tizi frè é sè bòdzè an-nou ; anba chenn lanmizè i ka rivé touné sèvèl a moun djòk ; anba chenn Léwòp krizokal ka vèglé nanm an-nou. Chenn an tèt, chenn nou dwètèt pété pou yo pa pété tèt an-nou. Longan pou djéri blès, dousin pou soulajé nanm anpenn, fòs pou bandé kè kwindik, é limyè pou kléré maléré.
Poézi a Nèg Mawon, sé Lanmou an-nou ba nou-menm an-nou, pou nou fè fos ansanm.